Era crisi a hèt qu'aguest an es rebaixes de junhsèga agen arribat tanben enes otèls d'Aran, era comarca de Lleida que concentre era ofèrta d'otèls mès en tot importar dera província e es mès grani. Segontes eth president dera Federacion de Hostaleria de Lleida, Juan Antonio Serrano, aguestes rebaixes se produsissen des de hè uns mesi damb er objectiu d'arribar ara major ocupacion otelèra.

Serrano, qu'a precisat qu'aguesti descompdes se dan en plan de zònes de grana ofèrta, a hèt aguestes declaracions ara Diputació de Lleida, durant era presentacion des previsions d'ocupacion toristica deth Patronat de Torisme, que calcule qu'aguest an es chifres seràn similares as der ostiu deth 2008.

Se se complissen es previsions deth patronat, enes mesi de junhsèga, agost e seteme visitaràn es comarques lleidatanes uns 800.000 turistes que somaràn uns 2,5 milions de pernoctacions.Es representadi des diferenti sectors toristics des Tèrres de Lleida an exprimit un moderat optimisme de poder mantier es nivèus d'ocupacion der an passat, afavoridi peth torisme de proximitat, maugrat qu'an plantejat que pòden notar efèctes dera crisi aguest mes.

Durant era presentacion eth president dera Diputació, Jaume Gilabert, a dit qu'era ofèrta toristica des Tèrres de Lleida creish cada an en productes e tanben en allotjaments. Segontes es sues dades "enes darrèri sies ans auem passat des 46.908 places deth 2004 as 52.776 d'aguest ostiu entre otèls, càmpings, torisme rural, albergs, rehuges e apartaments toristics, ua chifra que represente ua aumentacion deth 13%".

Ne roda premsa, Gilabert a hèt ua crida as lleidatans pr'amor qu'abans de decidir a on passar aguest ostiu es sues vacances consulten era ofèrta toristica de Lleida.